Романија го затвори и вториот реактор во нуклеарната централа Чернавода, откако драстичниот пад на нивото на Дунав го оневозможи ладењето на погонот. Властите во Букурешт прогласија енергетска вонредна состојба за целиот август, а прекинот во производството веднаш предизвика сериозен недостиг на електрична енергија и во Молдавија.

Двата реактори од по 706 мегавати во Чернавода покриваат петтина од вкупното производство на струја во Романија. Првиот реактор беше исклучен уште на крајот од јули, а компанијата „Нуклеарелектрика“ потврди дека вториот останува надвор од мрежата најмалку уште 10 дена.

За да го покрие дефицитот, Министерството за енергетика активираше блок на лигнит од 330 мегавати и максимално го зголемува производството од ветерот и хидроакумулациите. Дополнително, производителите на автомобили „Дачија“ и „Форд“ го прекинаа производството во земјата до 19 август за да помогнат во намалувањето на потрошувачката.

Исклучувањето на Чернавода директно ја погодува Молдавија, која се потпира на романскиот увоз за покривање на 60 проценти од сопствениот дефицит. Молдавските експерти предупредуваат на можни рестрикции доколку не се обезбедат дополнителни количини од Украина или од поскапите западни пазари.

Анализата на Европската опсерваторија „Коперник“ покажува дека на речиси две третини од текот на Дунав е забележан најнизок проток во последните 34 години, што предизвикува сериозни прекини и во речниот транспорт.

Сушата не ги погодува само романските капацитети. Во Франција, повеќе од 20 проценти од нуклеарниот капацитет е надвор од функција поради високите температури, проблемите со ладењето и појавата на медузи кај крајбрежните централи.

Во Унгарија, нуклеарката „Пакс“ исто така работи со намален капацитет, поради што властите во Будимпешта започнаа изградба на привремена брана на Дунав за да го контролираат протокот и да обезбедат вода за ладење.