Украина изврши серија напади со беспилотни летала врз цели во Русија во ноќта пред одбележувањето на Денот на победата во Москва, а експлозии беа пријавени во повеќе региони, меѓу кои Москва, Јарослав и Ростов на Дон. Според руски извори, противвоздушната одбрана пресретнала десетици дронови на приодите кон главниот град, додека руското Министерство за одбрана тврди дека во текот на ноќта биле соборени 264 украински беспилотни летала.
Најголемо внимание предизвика пожарот во рафинеријата „Јарославнефтеоргсинтез“ во Јарослав, каде по детонациите се појавија снимки со густ црн чад над индустрискиот комплекс. Украински и руски мониторинг-канали јавуваат дека нападите погодиле и индустриски објекти во Ростов на Дон, каде локалните жители пријавиле серија силни експлозии и пожар.
Во Москва, градоначалникот Сергеј Собјанин соопшти дека само во текот на ноќта биле пресретнати 26 дронови што се движеле кон руската престолнина. Поради нападите, руската воздухопловна агенција воведе привремени ограничувања на дел од московските аеродроми, меѓу кои „Внуково“ и „Домодедово“, што предизвика нарушувања во авионскиот сообраќај.
Нападите се случија во момент кога Москва и Киев меѓусебно се обвинуваат за кршење на примирјето. Русија прогласи дводневен прекин на огнот поврзан со прославата на Денот на победата, додека украинскиот претседател Володимир Зеленски претходно предложи пошироко и безусловно примирје кое би започнало на 6 мај. Киев тврди дека Русија продолжила со напади и борбени операции, додека Москва ја обвинува Украина дека го нарушува прогласеното примирје.
Зеленски изјави дека Украина ќе одговори доколку Русија продолжи со нападите, додека Москва предупреди дека секој обид за нарушување на настаните за Денот на победата може да предизвика жесток одговор. Според AP, Русија во претходните денови пријавила еден од најголемите украински бранови дронови од почетокот на војната, со напади врз повеќе од 20 региони и сериозни нарушувања во воздушниот сообраќај.
Новите напади покажуваат дека војната сè подлабоко се префрла и врз руската енергетска и индустриска инфраструктура. За Киев, ударите врз рафинерии и индустриски капацитети се начин да се ослаби руската воена машина, додека за Москва тие се доказ дека Украина нема намера да го почитува примирјето околу симболично најважниот руски празник. Во меѓувреме, шансите за вистински прекин на огнот остануваат минимални, бидејќи двете страни продолжуваат да зборуваат за примирје додека истовремено ја засилуваат воената активност.
