Екстремните горештини што деновиве ја зафатија Македонија повторно ги ставаат во фокус условите во кои работат илјадници граѓани, особено оние ангажирани во градежништвото, земјоделството, комуналните служби и другите дејности што се извршуваат на отворено.

Од Сојузот на синдикатите на Македонија предупредуваат дека и покрај високите температури, има работодавачи кои не ги почитуваат препораките за прекин или прилагодување на работниот процес во најтоплиот дел од денот, поради што работниците се изложени на сериозни здравствени ризици. 

Според синдикатите, веќе се регистрирани случаи на работници кои колабирале поради изложеност на екстремна жештина. Тие бараат засилени инспекциски контроли и доследна примена на мерките за заштита на здравјето при работа.

Медицинските експерти предупредуваат дека продолжената работа на високи температури може да предизвика дехидратација, исцрпеност, сончаница и топлотен удар, состојби кои можат да имаат сериозни последици доколку не се реагира навреме.

Во услови на портокалова или црвена фаза поради топлотен бран, институциите препорачуваат работното време да се прилагоди, да се обезбеди доволно вода за пиење, паузи во разладени простории и да се избегнува физичка работа во периодот кога температурите се највисоки.

Синдикатите оценуваат дека заштитата на здравјето на работниците мора да биде пред економскиот интерес и апелираат работодавачите да ги почитуваат препораките, бидејќи, како што велат, ниту една добивка не вреди повеќе од човечкиот живот и здравје.