Францускиот премиер Себастијан Лекорну денеска свика кризен состанок откако протестите за подобри услови во училиштата се проширија и на универзитетите. На состанокот се очекува повеќе министри да разговараат за барањата за дополнителни средства и кадар во образованието, пренесе „Независен“, повикувајќи се на ДПА.

Студентскиот сојуз „Union Étudiante“ соопшти дека утрово беа блокирани околу 30 универзитетски кампуси. Протестите следуваат по повеќедневни демонстрации на средношколците, кои бараат решенија за дотраените згради, преполните училници и недостигот од наставници.

За време на вчерашните протести полицијата уапси повеќе од 600 лица поради сомневања за палење и напади врз полицајци.

Денеска многу ученици протестираа мирно, но во дел од земјата беа регистрирани насилство и вандализам. Демонстранти запалија контејнери и фрлаа петарди, а во Нант беше запалена влезната сала на едно средно училиште.

Медиумите известија и за напади врз автобуси и автобуски станици. На неколку места полицијата употреби солзавец.

Кризниот состанок доаѓа додека протестите добиваат поширока поддршка меѓу учениците и студентите, а барањата за подобри услови во образованието остануваат во центарот на незадоволството.