Училишните протести низ Франција, предизвикани од недостиг на персонал и запуштени училишта, стануваат сè понасилни. Во Марсеј, напаѓачите го полеаа директорот на училиштето со бензин и запалија најмалку две образовни институции, потврдија официјални лица, објави Ројтерс .
Полицијата извести дека во Марсеј, стотици млади луѓе опколиле противпожарен камион кој пристигнал утрово за да го изгасне пожарот во средното училиште „Сент Егзипери“. Напаѓачите ги принудиле пожарникарите да излезат од возилото, кое потоа го запалиле. Во истиот град, директорот на средното училиште „Виктор Иго“ бил нападнат и повреден. Обвинителството го потврди нападот, но не објави дополнителни детали. Пожарникарите, исто така, известиле за пожар во училиште во Нант, на западот од земјата.
Заменик-градоначалникот на Нант, Оливие Шато, за „franceinfo“ изјави дека пожарот во средното училиште „Нелсон Мандела“ е под контрола и дека никој не е повреден. Тој објасни дека луѓето пронајдени во зградата биле евакуирани, а учениците кои посетувале настава биле испратени дома. Канцеларијата на градоначалникот одби да даде понатамошен коментар.
Владата одржа кризен состанок
Протестите и блокадите на училиштата, кои траат од минатата недела, претставуваат сериозен политички предизвик за владата. Ситуацијата е особено чувствителна бидејќи владата штотуку објави серија непопуларни мерки за штедење во буџетот за 2027 година. Протестите, во кои беа повредени десетици, предизвикаа итен состанок во канцеларијата на премиерот Себастијан Лекорну. Официјалните лица потврдија дека се уапсени стотици луѓе, претежно тинејџери.
Во париското предградие Сен Дени, групи млади луѓе се собраа пред полициски кордон, а еден студент носеше транспарент со пораката: „Можеме ли да разговараме без да бидеме испукани со солзавец?“ Учениците ја обвинуваат полицијата за прекумерна употреба на сила и солзавец.
Владата го осуди насилството што избувна за време на некои од протестите, но исто така рече дека проблемите во средните училишта мора да се признаат и да се решат. Министерот за внатрешни работи Лоран Нуњез рече дека на некои места, демонстрантите се движеле од училиште до училиште на организиран начин за да поттикнат насилство.
