Филмот, кој беше дел од меѓународниот уличен филмски фестивал „Џада“ во населбата Забјело, беше прекинат од група млади кои гласно протестираа.

ЕУ делегацијата, која финансиски го поддржа фестивалот, потсети дека „слободата на уметничкиот израз е составен дел од слободата на говор и една од суштинските демократски вредности“.

„Штрк“ е црногорска продукција во режија на признатиот косовски автор Иса Ќосја, роден во Вусање, Црна Гора, и во продукција на Иван Ѓуровиќ од „Артикулација филм“.

Дејството е сместено во мало црногорско село на границата со Албанија, а филмот обработува универзални теми како: деградација на жените, трговија со луѓе, присилни бракови, идентитет, сексуалност, самоубиства, општествени очекувања и борба за опстанок.

Организаторите потсетија дека фестивалот „Џада“ е „заедништво, гледање филмови под отворено небо, почитување на различностите и поврзување на луѓето преку филмот“.

Карна Растодер од полициската управа изјави за BIRN дека полицијата излегла на лице место, но не ги затекнала пријавените лица. „Постапките се во тек, обвинителството е информирано, а се собираат информации од повеќе извори“, додаде таа.

Новинарот Зоран Радуловиќ од неделникот „Монитор“ за ТВ „Вијести“ изрази сомнежи околу институционалниот одговор:
„Не слушнавме од надлежните безбедносни структури како е можно секој да прекине јавно случување, без да има заштита за граѓаните. Каде беше полицијата таа вечер?“

Тој додаде: „Ако некој има проблем со јазик, националност, сексуална ориентација или боја на кожа – во нормално општество тоа е негов проблем, за кој треба да се грижат неговото семејство и надлежните институции.“