Ватикан соопшти дека папата Лав попладнево успешно е опериран во римската болница „Џемели“, каде што хируршки му е отстранет мал јазол на белите дробови. Според официјалната потврда од Светата столица, медицинскиот зафат врз 71-годишниот поглавар на Католичката црква поминал без компликации и целосно според првичниот план на лекарскиот тим.

Папата беше примен во универзитетската клиника „Агостино Џемели“ во Рим претпладнето, по претходно утврден распоред за медицинската интервенција.

Како што пренесе Ројтерс, поглаварот претходно изјави дека станува збор за мала промена на ткивото која лекарите ја забележале во рана фаза за време на редовен медицински преглед. Брзата дијагностика овозможи интервенцијата да се изврши навремено со цел да се спречат идни дишни компликации.

Канцеларијата за печат на Светата столица потврди дека состојбата на поглаварот по операцијата е стабилна. Лекарскиот конзилиум предвидува дека процесот на постоперативно закрепнување во болнички услови ќе трае околу седум дена.

За тоа време сите редовни аудиенции и јавни обврски се ставени во мирување, додека Ватикан најави дека редовно ќе ја известува јавноста за текот на рехабилитацијата.