Околу седум милиони жители на округот Лос Анџелес дишеле воздух со концентрации на олово до 80 пати повисоки од вообичаените нивоа за време на урбаниот пожар Итон. Новата студија на хемичарките од Калифорнискиот институт за технологија (Калтек), објавена во списанието „Science Advances“, предупредува дека пламените стихии во населените подрачја создаваат сосема поинаков, драстично поопасен токсичен коктел во споредба со класичните шумски пожари, со директни последици врз јавното здравје на милионско население.

Силните ветрови Санта Ана на 7 јануари 2025 година го проширија огнот од кањонот Итон кон Алтадена, зафаќајќи повеќе од 9.000 објекти. Во пламенот исчезнаа станбени куќи, автомобили, батерии и електронски уреди. Истражувачкиот тим предводен од Харула Балиака и Нга Нг утврди дека токму ова гориво создаде специфичен хемиски потпис во воздухот. Покрај оловото, мерните станици забележаа високи концентрации на хлор, бром, цинк, бакар и арсен.

„За разлика од чадот од шумските пожари, кој со децении е во фокусот на истражувањата, овој облак настана од согорување на куќи, возила и инфраструктура. Станува збор за сосема поинакво гориво со посебен хемиски отпечаток“, соопшти научниот тим во својот труд.

Мерната станица на Калтек во Пико Ривера регистрираше дека на 9 јануари околу седум милиони луѓе биле изложени на концентрации на олово повисоки од 50 нанограми на кубен метар, при што загадувањето го достигна врвот во првите 48 часа од катастрофата.

Кога гори вештачки материјал, ризикот од инхалација на олово и други тешки метали е исклучително висок, а последиците врз респираторниот и нервниот систем кај децата се трајни.

Научниците предупредуваат дека токсичните честички на оловото не исчезнуваат со згаснувањето на огнот, туку се таложат во почвата и урбаната прашина, што бара долгорочно следење на животната средина и посебни протоколи за расчистување на згариштата.