Пожарот што избувна во близина на експресниот пат Велес – Штип излезе од контрола и продолжува да се шири кон населеното место Караслари, предизвикувајќи загриженост кај жителите, сопствениците на викендици и земјоделски имоти во околината.

Центарот за управување со кризи (ЦУК) соопшти дека, во координација со Дирекцијата за заштита и спасување (ДЗС), е подготвена воздушна интервенција за гаснење на огнената стихија. На располагање се ставени два воздухоплова кои ќе полетаат од Аеродромот во Скопје веднаш штом временските услови и контролата на летање го дозволат тоа.

Според првичните информации од терен, пожарот се шири поради сувата вегетација и ветерот, што дополнително ја отежнува интервенцијата на противпожарните екипи. Надлежните служби се постојано на терен и ја следат состојбата, со цел да се спречи натамошно ширење кон населените места.

Граѓаните од околните села се во неизвесност, додека институциите апелираат на смиреност и внимателно следење на официјалните информации. Сите ресурси се мобилизирани, а приоритет е заштита на луѓето и имотот.