Стотици пожарникари се борат со огнена стихија во близина на Атина, каде силните ветрови брзо го шират огнот кон населени места и индустриски објекти. Поради топлотниот бран и брзината на пожарот, властите наредија итна евакуација на локалното население, а дел од граѓаните мораше да бидат евакуирани преку море откако копнените патишта беа отсечени.

Пожарот што изби во регионот околу грчката престолнина брзо зеде замав под влијание на силните ветрови. Огнот директно загрози домови, фабрики и локални стопански објекти, што ги принуди службите за спасување да издадат наредби за евакуација.

Орканските ветрови дополнително им го отежнуваат пристапот на противпожарните екипи, а воздухопловите за гаснење периодично се соочуваат со потешкотии при интервенциите поради слабата видливост и турбуленциите.

Жителите од загрозените подрачја беа организирано спроведени на безбедно, додека во некои крајбрежни делови евакуацијата се одвиваше со помош на пловила. Според првичните информации од терен, оштетени се повеќе објекти и куќи, а противпожарните служби остануваат во висока состојба на приправност поради неповолните временски услови.