Глечерот Шварцмилцфернер (Schwarzmilzferner), сместен на австриската страна на Високите Алпи во Алгајскиот регион, го загубил статусот на глечер по овогодишното исклучително топло лето. За само неколку месеци изгубил повеќе од четири метри од дебелината на ледената покривка и приближно половина од својот волумен, откриваат научниците.
Глациолозите предупредуваат дека неговите последни денови се одбројани и дека ова ледено пространство наскоро би можело целосно да исчезне.
Научниците веќе 26 години го следат неговото исчезнувањеГлациологот Кристоф Мајер од Баварската академија на науките вели дека постои голема веројатност глечерот целосно да исчезне до следното лето.Тој и неговите колеги веќе 26 години внимателно ја следат состојбата на Шварцмилцфернер, кој беше последниот глечер во Високите Алпи во регионот Алгај, на австриската страна.
Набљудувањата покажуваат дека од 2016 година глечерот забрзано ја губи својата ледена маса.
„Овој тренд дополнително се интензивираше од 2022 година. Оттогаш ни е јасно дека неговите денови се одбројани“, изјави Мајер.Алпските глечери исчезнуваат со забрзано темпо.
За едно ледено пространство да се смета за глечер, не е важна само дебелината на ледената покривка и нејзиниот волумен. Клучен критериум е и глацијалниот тек – постојаното движење на мразот по падината или кон надвор под влијание на гравитацијата и сопствената тежина.
Кај Шварцмилцфернер ова движење веќе престанало, што е една од причините поради кои го загубил статусот на глечер.Леденото пространство се наоѓа во близина на границата меѓу Австрија и Германија, на надморска височина од околу 2.450 метри. Неговото исчезнување не е изолиран случај.
„Секоја година во Алпите исчезнуваат по неколку помали глечери“, вели Мајер, оценувајќи дека станува збор за тренд што практично не може да се запре.Дури и кога во текот на зимата има обилни снежни врнежи, ледените маси продолжуваат забрзано да се намалуваат.
„Летата сега станаа премногу топли за нив“, предупредува глациологот.Источните Варовнички Алпи би можеле да останат без мраз до 2070 година.
Прогнозите за иднината на алпските глечери се сè позагрижувачки. Според сегашните процени на Мајер, целото подрачје на Источните Варовнички Алпи, на крајниот југ на Германија и во западна Австрија, би можело да остане без мраз во периодот меѓу 2060 и 2070 година.
Исчезнувањето на Шварцмилцфернер е уште еден показател за последиците од сè потоплите лета и забрзаното топење на мразот во европските планински предели.
