Поранешниот шеф на израелската одбрана, Гади Ејзенкот , се наметнува како еден од главните политички противници на актуелниот премиер Нетенјаху во пресрет на парламентарните избори во Израел. Неговата нова центристичка партија „Yashar!“ („Равно!“) во последните анкети бележи брз раст и моментално се наоѓа веднаш зад владејачкиот Ликуд, што укажува на можна значајна промена во политичката сцена на земјата.

Изборите за нов израелски парламент мора да се одржат најдоцна до 27 октомври, а според најавите, гласањето најверојатно ќе се случи на 20 октомври. Анкетите покажуваат дека и блокот на власта и опозицијата би можеле да имаат потешкотии да обезбедат стабилно парламентарно мнозинство, со оглед на фрагментираниот политички систем.

Воен авторитет со политички амбиции

Ејзенкот беше началник на Генералштабот на израелската армија од 2015 до 2019 година, по што влезе во политиката. Познат е како експерт за безбедносни прашања, особено за Хезболах и ситуацијата во Либан.

Неговото лично искуство е обележано и со трагедија, неговиот син и двајца внуци загинаа во војната во Газа, што дополнително го засили неговиот јавен профил во израелското општество. Многу граѓани изразуваат сочувство и ја поврзуваат неговата приказна со пошироките последици од конфликтот.

Политички ставови и позиционирање

Ејзенкот се смета за умерен политичар. Тој се противи на присилно раселување на населението од Појасот Газа, но по нападите на 7 октомври изјави дека концептот за две држави во моменталниот контекст е практично „небитен“. Во дел од своите ставови, тој изразил и скепса кон евентуални израелски напади врз ирански нуклеарни постројки, сметајќи дека такви потези би биле оправдани само доколку постои непосредна егзистенцијална закана за Израел.

Со растот на неговата партија, политичката трка во Израел станува сè понеизвесна, а Ејзенкот се позиционира како сериозна алтернатива на долгогодишната власт на Нетанјаху.