Силни поплави и одрони предизвикани од невремето што ја зафати Италија од вчера создадоа хаос низ целата земја. Една жена го загуби животот откако со автомобил влезе во целосно потопен подвозник, а итните служби евакуираа десетици жители. Поројните дождови поплавија куќи, подруми и патишта во повеќе региони, додека противпожарните екипи непрекинато интервенираат со чамци и пумпи за спасување на заглавените граѓани.
Во градот Латисана, на североистокот меѓу Венеција и Трст, жена загина откако нејзиниот автомобил заврши под вода во поплавен подвозник. Возилото било целосно потопено пред спасувачките екипи да стигнат до местото.
⛈️Diversi allagamenti segnalati tra Caorle, Eraclea, Lignano, San Michele al Tagliamento e Latisana a causa di un temporale autorigenerante che da questa notte sta scaricando tra i 100 e i 200 mm di pioggia nella costa veneta e friulana.
— Italia 24H Live 🔴 – Notizie dall'Italia (@Italia24HLive) September 10, 2026
Video di Ivano Maset da Lignano (UD). pic.twitter.com/XZLHIQQaOW
Целиот појас кон крајбрежниот град Лињано Сабјадоро е под длабока вода. Противпожарните служби со чамци и механизација со часови интервенираат на десетици локации каде што се поплавени подруми, гаражи и станбени куќи, а патните правци се непроодни за сообраќај.
Во источниот дел на регионот Венето, противпожарните служби примиле над 130 барања за интервенција во рок од неколку часа. Најкритична е состојбата во општините Сан Дона ди Пјаве, Ераклеа, Каорле и Сан Микеле ал Таљаменто, каде што спасувачите масовно испумпуваат вода.
Штети се регистрирани и во централниот и западниот дел на земјата. Одрони, паднати дрвја и поројни води предизвикаа прекини во сообраќајот и материјални штети во Рим, Лигурија и делови од Тоскана.
