Сплитската полиција уапси четири лица и идентификуваше уште петнаесеттина учесници во навивачкиот марш на Торцида, кои се сомничат за јавно поттикнување на насилство и омраза. Во пресрет на натпреварот меѓу Хајдук и Ајакс, поголема група навивачи маршираше низ градот извикувајќи отворени нацистички и антисемитски пароли. Институциите најавија прегледување на стотици видеоснимки за целосно расчистување на настанот што предизвика силна осуда во регионот.

Полициските службеници во Сплит веќе приведоа четири лица, а преку анализа на снимените материјали утврдија идентитет на уште петнаесетмина учесници кои засега не се пронајдени на своите домашни адреси. За разлика од прекршочните пријави за нарушување на јавниот ред и мир, четворицата уапсени се гонат кривично.

Станува збор за тешко кривично дело на јавно поттикнување омраза и насилство. Осомничените во текот на денот се изведени пред истражен судија, додека инспекторите продолжуваат да ги проверуваат теренските снимки за нови приведувања.

Инцидентот се случи додека членовите на навичката група Торцида се упатуваа кон стадионот Пољуд. На чело на поворката се движеше автомобил со импровизиран ковчег на кој пишуваше „Ајакс“, кој навивачите подоцна го скршија на улица.

Од колоната одекнуваа извици со кои се славеше концентрациониот логор Аушвиц, се повикуваше на насилство врз Евреите и се возвишуваше Адолф Хитлер, со директни навреди насочени дури и кон трагичната судбина на Ана Франк. Очевидците и снимките потврдија дека не се работеше за изолиран инцидент на поединец, туку за колективно скандирање на поголема група.

Паралелно со оваа кривична истрага, Жупанискиот суд во Сплит одреди едномесечен истражен затвор за петмина младинци кои претходно учествуваа во масовните физички судири со полицијата на сплитската Рива. За време на тие нереди беа приведени дополнителни 52 лица.

Полицијата соопшти дека прегледот на видеозаписите продолжува и во наредните денови.