Новите евро банкноти, кои треба да бидат поеколошки, попристапни за употреба и опремени со подобрени безбедносни карактеристики, ќе почнат да се пуштаат во оптек на почетокот на 2030-тите, објави Европската централна банка (ЕЦБ).
Конечната одлука за дизајнот на новата генерација европски банкноти треба да се донесе до крајот на 2026 година, по што ќе следат подготовки за нивно производство и постепено пуштање во оптек.
При изборот на дизајнот, Управниот совет на ЕЦБ ќе се потпре на технички проценки, препораки од независно жири и резултатите од голема анкета спроведена од 23 јули до 21 септември.
Во гласањето учествуваа 9,96 милиони луѓе од Европа и други делови од светот. ЕЦБ особено укажа на големиот интерес кај помладите учесници, додека излезноста во земјите од еврозоната беше значајна во однос на вкупното население.
На граѓаните им беа понудени десет предлози за дизајн, поделени во две тематски единици – „Европска култура“ и „Реки и птици“.
Европската централна банка сè уште не објави кои предлози добиле најголема поддршка, наведувајќи дека резултатите ќе бидат дел од поширок процес на донесување одлуки за конечниот дизајн на банкнотите.
Нов изглед, посилна заштита
Промената на дизајнот е дел од пошироките напори на ЕЦБ за прилагодување на евро банкнотите кон современите технолошки, безбедносни и еколошки стандарди. Покрај новите визуелни решенија, планот е да се подобри заштитата од фалсификување, како и да се олеснат препознавањето и употребата на банкнотите.
Сегашните евро банкноти содржат архитектонски мотиви од различни периоди од европската историја – прозорци и врати на предната страна и мостови на задната страна. Тие се наменети како симболи на отвореност, соработка и поврзаност на европските народи.
Минатата година, ЕЦБ мораше да одговори и на тврдењата што се ширеа на социјалните мрежи дека ликот на ѓаволот наводно може да се види на банкнотата од 50 евра, по специфично преклопување и гледање во огледало.
Централната банка во тоа време изјави дека ваквите форми немаат намерно значење, туку дека мотивите на банкнотите се дел од тема посветена на европските архитектонски епохи и стилови.
Новата евро серија ќе биде првата голема промена во визуелниот идентитет на европските банкноти по долго време, а граѓаните ќе можат да ги користат старите банкноти дури и по воведувањето на нови, во согласност со правилата што ЕЦБ ќе ги утврди подоцна.
