Хаотични сцени денеска се забележани во Бејрут, каде што илјадници жители ги напуштаат јужните предградија по најавата за нови израелски воздушни напади врз позиции поврзани со Хезболах. На патиштата кон побезбедните делови од градот се формираа километарски колони, додека семејства во паника се обидуваат да ја напуштат областа пред почетокот на најавените операции.

Израелскиот премиер Бенјамин Нетанјаху нареди воздушни напади врз јужните делови на Бејрут, наведувајќи дека станува збор за одговор на, како што тврди, повторени прекршувања на примирјето и напади врз израелски цели. Во меѓувреме, Израелски одбранбени сили издадоа нови наредби за евакуација на жители од повеќе населени места во јужен Либан, барајќи населението веднаш да се оддалечи од потенцијалните цели.

Според израелските власти, операциите се насочени кон воената инфраструктура на Хезболах и кон создавање безбедносна зона во близина на реката Литани. Израелскиот министер за одбрана Израел Кац порача дека „нема да има мир во Бејрут ако нема мир на северот на Израел“, најавувајќи продолжување на операциите против вооружените структури на Хезболах.

Од друга страна, остри реакции пристигнаа од Иран. Министерот за надворешни работи Абас Арагчи предупреди дека секое кршење на примирјето во Либан претставува закана за пошироката регионална стабилност и може да има сериозни последици.

Според либанските медиуми, во најновите воздушни напади во јужен Либан загинале најмалку шест лица, додека повеќе населени места биле погодени од напади со дронови и борбени авиони. Во меѓувреме, Европска Унија упати повик до Израел веднаш да ја запре воената ескалација и да го почитува суверенитетот на Либан.

Развојот на настаните дополнително ги зголемува стравувањата од поширока регионална криза, во момент кога безбедносната состојба на Блискиот Исток и онака е сериозно нарушена по последните тензии меѓу Израел, Иран и нивните сојузници во регионот.