Изгласано е недоверба на владата на Романија, со што се распадна проевропската коалиција и се отвори нов период на политичка нестабилност, помалку од една година откако дојде на власт. Парламентот изгласа недоверба на владата на премиерот Илие Боложан со 281 глас „за“ и само четири „против“.
Иницијативата ја покренаа Социјалдемократската партија и десничарската опозициска Алијанса за обединување на Романците, откако социјалдемократите ја напуштија коалицијата кон крајот на април. Пратениците од Националната либерална партија, како и нивните партнери Унија за спас на Романија и унгарската малцинска партија УДМР, не учествуваа во гласањето.
Боложан ја оцени иницијативата како „цинична и вештачка“, нагласувајќи дека неговата влада спровела тешки, но неопходни економски мерки. Од друга страна, Социјалдемократската партија го обвини дека не реализирал суштински реформи и дека земјата има потреба од лидер способен за соработка.
Политичката криза доаѓа во период кога Романија се соочува со висок буџетски дефицит, инфлација и техничка рецесија, како и продолжена нестабилност по поништените претседателски избори во 2024 година. За формирање нова проевропска влада ќе биде неопходна поддршка од Социјалдемократската партија, која засега исклучува коалиција со AUR.
