Отпорноста на бактериите на антибиотици, која во Европската Унија е поврзана со околу 35.000 смртни случаи годишно, станува сè пораспространета. Ова ги засилува повиците за посеопфатен пристап во справувањето со еден од најголемите предизвици за јавното здравје, предупредуваат експертите.

„Отпорноста на антибиотици настанува кога микроорганизмите повеќе не можат да се лекуваат со лековите што вообичаено ги користиме за нивно сузбивање“, објаснува професорката Фиона Волш од Универзитетот Мејнут во Ирска. Нејзиното истражување е насочено кон резистенцијата во контекст на здравјето на луѓето, животните и животната средина, пренесува „Еуроњуз“.

Научниците предупредуваат дека влијанието на антимикробната резистенција врз здравјето може да се спореди со влијанието на грипот, туберкулозата и ХИВ-от заедно.

Последиците можат да бидат особено сериозни кај пациентите заразени со бактерии отпорни на повеќе видови лекови. Лекарите понекогаш се принудени да комбинираат неколку антибиотици за да ја лекуваат инфекцијата, но во одредени случаи ниту таквите комбинации не даваат резултати.

Студија објавена во медицинското списание „Лансет“ предвидува дека бактериската антимикробна резистенција би можела директно да предизвика 39 милиони смртни случаи во светот во периодот од 2025 до 2050 година.

Меѓу факторите што придонесуваат за ширење на отпорноста се прекумерната употреба на антибиотици кај луѓето, нивната примена кај животните, лошите санитарни услови и загадувањето на животната средина.

Бактериите, како и генетскиот материјал што им овозможува отпорност на антибиотиците, можат да се пренесуваат меѓу луѓето, животните и животната средина.

Каква е улогата на вакцините?

Поради поврзаноста меѓу здравјето на луѓето, животните и животната средина, истражувачите сè почесто го применуваат пристапот „Едно здравје“ (One Health). Тој се темели на сознанието дека здравјето на луѓето не може да се разгледува одделно од здравјето на животните и состојбата на животната средина.

„Добрата вест е дека постојат многу различни начини за уништување на бактериите и овие микроорганизми“, вели Волш.

Вакцините можат да го намалат бројот на инфекции, а со тоа и потребата од употреба на антибиотици. Светската здравствена организација проценува дека подобрата примена на вакцините би можела да ја намали глобалната потрошувачка на антибиотици за 2,5 милијарди дози годишно.

Според Волш, бактериите се борат и меѓу себе, па здравиот бактериски систем во човечкиот организам може да помогне во борбата против инфекциите.

Решението, според неа, не е само во развојот на нови антибиотици, иако тие и понатаму се важни. Истражувачите треба да се насочат и кон вакцините, прочистувањето на отпадните води и подобрувањето на здравјето на животните во целиот синџир на исхрана.