Примавера Саунд веќе заврши, Гластонбери оваа година паузира, а билетите за многу од најголемите европски фестивали одамна се распродадени. Но, тоа не значи дека летната музичка сезона е затворена.
Низ Европа сè уште има фестивали со достапни билети, за различни вкусови – од инди рок и електроника, до техно, експериментална музика и хеви метал. Дел од нив се одржуваат на спектакуларни локации, па искуството е многу повеќе од само концерт.
Festival de Nîmes – музика во антички амфитеатар
Од 11 јуни до 26 јули, францускиот град Ним ќе биде домаќин на еден од најнеобичните летни фестивали во Европа. Концертите се одржуваат во античкиот римски амфитеатар, изграден околу 100 година од нашата ера.
Фестивалот трае шест недели, но секоја вечер има по еден главен концерт. Годинава на програмата се Кети Пери, Лени Кравиц, Џамироквај, Блек Ајд Пис, Пиксис, Стинг, Ник Кејв, The Cure и Lorde. Цените зависат од изведувачот, а за дел од концертите билетите се веќе при крај.
Exit2Montenegro – две фестивалски изданија на Јадранот
Exit ова лето се сели од Нови Сад кон црногорското крајбрежје и ќе се одржи во две изданија. Првото е од 3 до 6 јули на Долга плажа во Улцињ, а второто од 28 до 31 август во Будва.
Улцињ ќе биде насочен кон хаус и техно звук, со имиња како Argy, Jamie Jones, Maceo Plex, Monolink и Stephan Bodzin. Будва, пак, ќе го затвори летото со Peggy Gou, Charlotte de Witte, Hugel и Enrico Sangiuliano. Најголемата предност е што општата влезница е бесплатна со претходна регистрација, додека ВИП билетите се движат од 50 до 150 евра.
Rock Werchter – белгиски фестивал за сите вкусови
Од 2 до 5 јули во Ротселар, Белгија, се одржува Rock Werchter – фестивал кој и покрај името одамна не е само рок настан. Годинава програмата ги спојува The Cure, Franz Ferdinand, Rise Against, The Vaccines и Elvis Costello со Gorillaz, The Prodigy, FKA Twigs, Ethel Cain, Moby, Mogwai, Halsey и Twenty One Pilots.
Фестивалот има повеќе од 50 години традиција и репутација на место каде што публиката може да види големи светски имиња, но и артисти кои допрва ќе станат огромни. За одредени денови сè уште има ограничен број билети.
Lost Music Festival – музика во најголемиот бамбусов лавиринт во светот
Од 2 до 6 јули, италијанскиот Fontanellato ќе биде домаќин на Lost Music Festival, кој се одржува во Labirinto della Masone – најголемиот бамбусов лавиринт во светот, во близина на Парма.
Фестивалот е фокусиран на експериментална музика, дигитална уметност и аудиовизуелни инсталации. На програмата се KeiyaA, Jokkoo, Ulla, Foodman, Saint Abdullah & Eomac и Prison Religion. Ова е фестивал за оние што бараат поинакво, уметничко и помалку комерцијално музичко искуство.
Westival – опуштен фестивал покрај велшкото крајбрежје
Westival се одржува од 2 до 5 јули во Пемброкшир, Велс, во близина на градот Tenby. Наместо масовна фестивалска гужва, тој нуди поопуштена атмосфера, кампување, електронска музика, работилници и велнес содржини.
Годинава настапуваат Shy FX, High Contrast, 4am Kru, Ms Dynamite, Antony Szmierek, Crazy P, Dan Shake и Dr Banana. Посетителите може да резервираат сауна, топла када, студено нуркање или престој во јурта. Билетите се веќе околу 90 проценти распродадени.
Tolminator – метал во срцето на словенечките Алпи
Од 24 до 28 јули, Толмин во Словенија повторно ќе стане собиралиште за љубителите на метал музиката. Tolminator се одржува во долината на Соча, меѓу планини и реки, што го прави еден од најсценските фестивалски простори во Европа.
Годинава настапуваат In Flames, Satyricon, Hatebreed, Deicide, Deafheaven, Heaven Shall Burn, Municipal Waste, Agnostic Front и Wolves in the Throne Room. Фестивалските и кампинг билетите сè уште се достапни.
Sziget – островска фестивалска република во Будимпешта
Sziget Festival ќе се одржи од 11 до 15 август на островот Обуда во Будимпешта. Фестивалот има повеќе од 50 сцени и програма што вклучува поп, рок, електроника, театар, циркус, работилници и општествени иницијативи.
Годинава на програмата се Florence + The Machine, Natasha Bedingfield, Peggy Gou, Jorja Smith, bbno$ и Sombr. Покрај музиката, Sziget нуди и содржини преку Impact Island и Changemakers, посветени на социјални и еколошки теми. Достапни се дневни, повеќедневни и целосни фестивалски билети.
Syd for Solen – инди лето во Копенхаген
Од 13 до 15 август, Syd for Solen ќе се одржи во Valbyparken во Копенхаген. Фестивалот е помал и попристапен од големите европски фестивали, без огромни кампинг-зони и долги пешачења меѓу сцени.
Годинава настапуваат Lorde, Wilco, Blood Orange, Geese, Dijon, The xx, Iceage, Wednesday, Horsegirl и Ninajirachi, заедно со дански инди, фолк и рок артисти. Повеќедневните билети се веќе распродадени, но сè уште има дневни влезници.
