Член на спасувачкиот нуркачки тим што ги пронајде телата на италијанските нуркачи на Малдивите изјави дека опремата со која биле пронајдени „не била оптимална“, а како можен фактор за трагедијата го посочи тоа што групата немала сигурносно јаже.
Финскиот нуркач Сами Паакаринен, кој учествувал во потрагата, за италијанските медиуми изјави дека телата биле пронајдени заедно во еден дел од подводната пештера. Тој ја опиша пештерата како многу длабока и исклучително тешка за нуркање.
Несреќата се случила на атолот Вааву, каде пет италијански нуркачи исчезнале за време на нуркање во пештера длабока околу 60 метри. Телото на еден од нив било пронајдено набрзо по исчезнувањето, додека останатите четири тела биле откриени неколку дена подоцна од специјализиран тим фински и малдивски нуркачи.
За време на потрагата починал и еден малдивски нуркач-спасувач, што дополнително ја зголеми тежината на трагедијата. Станува збор за една од најтешките нуркачки несреќи регистрирани на Малдивите, туристичка дестинација позната по коралните острови и подводниот свет.
Паакаринен за „Ла Република“ изјави дека, откако ги пронашле телата, добиле впечаток дека причината би можела да биде „трагична човечка грешка“, но нагласи дека истрагата треба да утврди што точно се случило.
Тој постави прашање зошто нуркачите влегле во пештера без соодветна опрема. Според него, тој и неговите колеги никогаш не би влегле во таква средина без макара со јаже или сигурносна линија, која ја опиша како „Аријаднина нишка“. Таквото јаже служи за ориентација и безбедно движење низ сложен или опасен подводен терен.
„Општо, оние што нуркаат во пештери знаат дека не е мудро тоа да се прави без сигурносно јаже“, изјави тој, додавајќи дека во повеќето несреќи при пештерско нуркање главната причина е човечка грешка.
Паакаринен не сакал да навлегува во детали, но посочи дека опремата со која биле пронајдени нуркачите не била соодветна за подводно пештерско нуркање.
Меѓу загинатите биле професорката Моника Монтефалконе и научната соработничка Муриел Оденино од Универзитетот во Џенова, кои престојувале на Малдивите поради истражување на влијанието на климатските промени врз биодиверзитетот. Во групата биле и Џорџија Сомака, ќерка на професорката Монтефалконе и студентка на истиот универзитет, како и Федерико Гуалтиери, кој неодамна дипломирал.
Првата пронајдена жртва бил Џанлука Бенедети, водител на бродски операции и инструктор по нуркање.
Групата нуркала на атолот Вааву на 14 мај, а исчезнувањето било пријавено откако не се вратиле на површината. Полицијата соопшти дека во тоа време во областа, на околу 100 километри јужно од главниот град Мале, имало лоши временски услови и било издадено жолто предупредување за патнички бродови и рибари.
Истрагата за причините за несреќата продолжува.
