САД разговараат за можноста нуклеарното оружје да биде распоредено во дополнителни европски земји членки на НАТО, како дел од обидот да се зајакнат безбедносните гаранции за Европа во период на зголемени тензии со Русија и неизвесност околу идното американско воено присуство на континентот.

Според „Financial Times“, разговорите се доверливи и се водат во рамки на НАТО, но засега нема конечна одлука. Во фокусот е проширување на постојниот систем за нуклеарно споделување, преку кој дел од европските сојузници се домаќини на американско нуклеарно оружје и авиони способни да носат такво оружје.

Во моментов, програмата на НАТО за нуклеарно споделување ги вклучува Белгија, Германија, Италија, Холандија, Турција и Велика Британија. Оружјето останува под американска контрола, а одлуката за евентуална употреба ја задржува Вашингтон.

Посебен интерес за вакво распоредување покажуваат земјите од источното крило на НАТО, меѓу кои Полска и балтичките држави, кои бараат посилни гаранции по руската инвазија врз Украина. Полските власти и претходно јавно повикуваа САД да размислат за распоредување нуклеарно оружје на полска територија.

Темата повторно се отвора во момент кога Европа се обидува да ја засили сопствената одбрана, а САД најавуваат поголем фокус кон други региони. За НАТО, нуклеарното одвраќање останува еден од клучните елементи на безбедносната архитектура, но секое можно проширување би било чувствителна политичка и безбедносна одлука со силна порака кон Москва.