Нов бран руски државјани ги крена кириите во Србија за 30 отсто во последните два месеци, а агентите за недвижности очекуваат уште поголем притисок врз пазарот во наредниот период. По зголемената побарувачка, становите што чинеле 400 евра сега достигнуваат и до 600 евра месечно, оставајќи ги домашните потстанари во Белград и Нови Сад пред нов сериозен финансиски удар.

Летните шпекулации за евентуален нов круг воена мобилизација во Русија покренаа нови заминувања од земјата. Иако претседателот Владимир Путин ги отфрли овие наводи како неосновани со тврдење дека нема потреба од дополнителна регрутација, дел од граѓаните решија да не ризикуваат, објави рускиот независен медиум Медуза.

Србија повторно се најде меѓу главните дестинации. Агентите за недвижности потврдуваат дека сите авионски летови кон Белград се однапред резервирани, а најголемиот интерес традиционално е насочен кон главниот град и Нови Сад.

Зголемениот прилив веднаш ги помести цените на пазарот за изнајмување. Според податоците на агенциите за недвижности, недвижностите со месечна закупнина од 1.000 евра сега достигнуваат 1.300 евра, додека помалите станови што се издаваа за 400 евра веќе чинат околу 600 евра.

Понудата во моментов не може да одговори на побарувачката. Бројот на слободни единици на пазарот брзо се намалува, што повторно го отвора проблемот со станбениот простор во српските градови.

За разлика од првиот бран во 2022 година кога се изнајмуваше по секоја цена, актуелните клиенти настапуваат значајно повнимателно. Агентите на терен забележуваат дека новите доселеници детално ги споредуваат понудите и не влегуваат лесно во прескапи договори.

Сепак, цените не се вратија на нивото од пред војната во Украина, кога во Србија годишно се доселуваа најмногу до 2.000 Руси. Во 2022 година пристигнаа над 19.000, а во 2023 година речиси 23.000 руски државјани, што тогаш предизвика скок на кириите и до 200 отсто. Новиот раст директно ги турка локалните потстанари кон периферијата или кон барање значително помали станови.