Инфлацијата во еврозоната повторно забрзува, а најновите прогнози укажуваат дека во август би можела да достигне 3,3 отсто на годишно ниво. Тоа би било највисока стапка од 2023 година и значително зголемување во однос на 2,9 отсто во јули, покажува анкетата на „Блумберг“ меѓу 31 економист.

Главниот двигател на новиот раст на цените повторно е енергијата, во услови на продолжени тензии на Блискиот Исток и повисоки трошоци за гориво.

Ценовниот притисок се засилува и во најголемите економии во еврозоната. Се очекува инфлацијата да порасне во Германија и Италија, додека податоците од Шпанија и Франција веќе покажаа поголем раст на цените од очекуваниот.

Во Германија инфлацијата би можела да достигне 3,1 отсто, што би било највисоко ниво од почетокот на 2024 година. Во Италија се прогнозира стапка од околу 3,4 отсто, највисока во речиси три години. Новите податоци се особено значајни за Европска централна банка, која на 10 септември треба да донесе нова одлука за каматните стапки.

На финансиските пазари веќе се зголемуваат очекувањата дека ЕЦБ би можела повторно да ги зголеми каматите доколку инфлацијата продолжи да се оддалечува од нејзината цел од 2 отсто. Сепак, има и еден податок што може да ѝ даде одредена причина за претпазлив оптимизам на централната банка. Базичната инфлација, која ги исклучува променливите цени на енергијата и другите нестабилни категории, се очекува да остане околу 2,5 отсто.

Но, доколку бензинот и другите енергенти продолжат да поскапуваат, тоа би можело дополнително да ја зголеми вкупната инфлација и да го отежне патот на ЕЦБ кон целта од 2 отсто.

Дел од претставниците на централната банка веќе предупредуваат дека инфлацискиот притисок можеби нема да исчезне сам од себе. Доколку растот на цените продолжи подолго време над посакуваното ниво, ново зголемување на каматните стапки повторно може да стане опција.

Практично, европската економија повторно се соочува со истиот проблем: поскапата енергија ја враќа инфлацијата нагоре, а со тоа расте и притисокот врз ЕЦБ да реагира.