Николас Кејџ јавно го потврди своето повлекување од проектите на Амазон откако одби да потпише согласност за користење вештачка интелигенција во претстојната серија „Спајдер Ноар“. За време на панелот на њујоршкиот Комик Кон, актерот истакна дека не поддржува вакви технологии и најави дека во иднина ќе се фокусира на соработка со помлади филмаџии кои негуваат традиционален пристап кон кинематографијата.

Говорејќи пред публиката во Њујорк, Кејџ директно ја посочи деловната политика на Амазон како главна причина за прекинот на соработката. Тој потсети на нивните масивни вложувања во нови технолошки решенија, споменувајќи ја сумата од 50 милијарди долари инвестирана во развој на вештачка интелигенција.

„Јас не сум актер кој поддржува ВИ. Ниту сум дел од тој клуб, ниту потпишав согласност за нејзино користење во ‘Спајдер Ноар’. Верувам дека повеќе нема да работам за тој студио, но тоа е во ред“, изјави Кејџ.

Наместо да се потпира на големите продукциски куќи кои се свртуваат кон алгоритамски решенија, актерот планира целосно да го промени курсот. Неговиот следен чекор вклучува работа со помлади автори, особено режисери од генерацијата Зет кои преферираат традиционален начин на снимање.

Оваа одлука не значи крај на неговата кариера. Кејџ веќе најави учество во петтата сезона на серијата „Тру Детектив“ во продукција на ХБО, како и главна улога во новиот трилер „Периш“.