Австралиската актерка продолжила со снимање и покрај грип и слабост, по што била пренесена во болница и примила инфузија.
Австралиската актерка Никол Кидман била пренесена во болница откако ѝ се слошило за време на снимањето на серијата „Margo’s Got Money Troubles“, во која има физички напорни сцени поврзани со професионално борење.
Според сведочењето на нејзиниот колега Ник Оферман, сцената се снимала на 22 април и вклучувала комплексна кореографија во ринг, со каскадери и тренинг-тим. Тој раскажал дека екипата уште утрото добила информација дека Кидман има грип и дека постои можност да не се појави на снимањето.
„Беше многу бледа и се тресеше. Имаше навистина тежок грип“, изјавил Оферман, додавајќи дека Кидман сепак дошла на сетот и ја завршила сцената.
Во серијата Кидман ја толкува Лејс, професионална борачка, додека Оферман го игра нејзиниот противник Џинкс. Поради тоа, снимањето барало реални физички движења и контакти, внимателно координирани со тимот за безбедност и каскадери.
По завршувањето на сцената, актерката, според зборовите на Оферман, била веднаш пренесена во болница, каде што примила инфузија.
„Вака се станува Никол Кидман — така што се појавуваш за твојата серија да не изгуби ни минута од твојата вредност“, изјавил Оферман, опишувајќи го нејзиниот гест како „неверојатен“ и „великодушен“.
Во истиот контекст се наведува дека Кидман претходно зборувала дека имала страв да не се повреди при влегувањето во ринг. Сепак, таа истакнала дека кога ќе почне со задача, целосно се фокусира на изведбата и настојува да биде максимално внимателна.
