Македонската публика ќе има можност бесплатно да го погледне филмот „Незаборавна пролет во заборавено село“ во режија на Куштрим Бектеши. Проекцијата ќе се одржи на 10 август од 19:00 часот во киното „Синеплекс“ во Скопје, како дел од иницијативата „Македонски филм. На големо платно“. Влезот за сите посетители е слободен, а настанот нуди шанса за враќање на домашното филмско творештво во кино-салите.
Дејството на филмот ги следи случувањата во едно изолирано населено место, а кадрити се снимани во селото Ѓономаљ во албанската општина Корча. Мирниот и секојдневен ритам на локалното население се менува откако познатите браќа-макроа отвораат нова кафеана. Со доаѓањето на три проститутки, објектот брзо станува главна точка на интерес за мажите од селото.
Новиот бизнис предизвикува незадоволство и загриженост кај жените поради отсуството на нивните сопрузи. Во исто време, локалниот оџа се соочува со сè помала посетеност во џамијата, што дополнително ги продлабочува тензиите во заедницата.
Приказната доаѓа до драматичен пресврт кога кафеаната завршува во пламен. И покрај уништувањето на објектот, градоначалникот го оценува проектот како успешен и добива идеја за нов потфат. Наместо обнова на старата локација, тој одлучува дека е време да се инвестира во отворање на казино.
Сценариото и режијата се на Куштрим Бектеши, а актерската екипа ја чинат Шкумбин Истрефи, Осман Ахмети, Ндричим Џепа, Луан Јаха, Салаетин Билал, Музбајдин Ќамили, Адем Карага, Амернис Нокшиќи Јовановска, Флора Кадриу и Блерим Дардишта.
Програмата „Македонски филм. На големо платно“ продолжува да нуди бесплатни проекции за публиката секој понеделник од 19:00 часот во „Синеплекс“, сместен во Скопје Сити мол. Организаторите ги покануваат сите љубители на седмата уметност да дојдат и да ги проследат остварувањата од домашната кинематографија на филмското платно.
