ЈП „Паркови и зеленило“ апелира до граѓаните да не ги паркираат своите возила под дрвја и да избегнуваат задржување во близина на висока вегетација поради најавеното нестабилно време во Скопје.

Според Управата за хидрометеоролошки работи, денеска се очекува променливо облачно и посвежо време со повремени врнежи од дожд, кои на места ќе бидат пообилни. Во делови од котлината можно е да има нестабилност проследена со пороен дожд, грмежи и засилен ветер.

Од „Паркови и зеленило“ предупредуваат дека ваквите временски услови носат ризик од паѓање гранки или дрвја, особено по неодамнешното силно невреме кое оштети голем број дрвја во градот.

Целта на апелот е да се избегнат несакани последици и материјални штети, но и да се зголеми безбедноста на граѓаните.

Воедно, од претпријатието ги повикуваат граѓаните веднаш да пријават доколку забележат паднати дрвја, скршени гранки или други опасности предизвикани од временските услови, на бројот за итни случаи 112 или на дежурните телефони.

Иако не се прогнозира силно невреме како претходното, институциите предупредуваат дека претпазливоста е неопходна, бидејќи дел од дрвјата можеби се веќе ослабени и нестабилни.