Обилни дождови и силни ветрови предизвикаа поплави, оштетувања на патишта и проблеми со електричната енергија на грчкиот остров Крит. Властите испратија предупредувања преку бројот 112, повикувајќи ги жителите и посетителите да го ограничат движењето во загрозените подрачја.

Островот е ставен во состојба на мобилизација „Црвен код“ од вечерта на 30 септември до недела, 4 октомври, поради зголемената опасност од поплави. Пожарникарите интервенираат за испумпување вода, расчистување паднати дрвја и евакуација на луѓе.

Во областа Ретимно, мост во близина на Ливадија се урна додека преку него минуваше автомобил со брачна двојка. Двајцата патници беа спасени и пренесени во болница. Во Зонијана беа поплавени домови, а повеќе населени места останаа без струја по оштетувања на електричната мрежа.

Во меѓувреме, грчките медиуми објавија дека 80-годишен сточар, кој исчезна во средата вечерта во селото Каринес, беше пронајден мртов во корито на поток во близина на неговото трло. Точната причина за смртта се истражува и засега не е утврдено дали таа е директно поврзана со невремето.

Силниот ветер го наруши и поморскиот сообраќај. Во четвртокот претпладне беше воведена забрана за пловидба од пристаништата Рафина и Лаврио. Во Пиреас немаше општа забрана, но беа изменети или откажани дел од поаѓањата на брзите бродови кон островите во Саронскиот Залив. Патниците се советуваат пред патување да проверат кај превозниците и пристанишните служби дали нивната линија сообраќа.

Училиштата во Ханија и Ретимно се затворени, а на островот се испратени дополнителни спасувачки екипи и опрема. Според прогнозите, интензивни врнежи и грмотевици се можни повремено до недела наутро, додека ветровите во делови од Егејското Море може да достигнат осум до девет Бофори.