Екипите на Општина Центар и денес продолжуваат со расчистување на последиците од силното невреме што го зафати Скопје и предизвика паднати дрвја, оштетувања и ризични ситуации на повеќе локации во централното градско подрачје.

Веднаш по невремето бил свикан итен состанок на Општинскиот штаб за заштита и спасување, по што сите расположливи служби биле испратени на терен.

Интервенциите продолжиле до доцна во ноќта, а екипите повторно почнале со работа во раните утрински часови.

Се расчистувало во Капиштец, Дебар Маало, Пролет и Буњаковец

Во текот на ноќта се интервенирало во повеќе населби и делови од општината, меѓу кои Капиштец, Дебар Маало, Пролет, Буњаковец и околината на Соборниот храм.

Екипите работеле на отстранување паднати дрвја, расчистување оштетувања на инфраструктурата и санирање на локации што претставувале опасност за граѓаните.

„Наш приоритет е што побрзо да ги отстраниме сите опасности и да ја нормализираме состојбата“, изјави градоначалникот на Општина Центар, Горан Герасимовски.

Тој им се заблагодари на службите за ангажманот, а на граѓаните за трпението и навременото пријавување на проблемите.

Општината ги повика граѓаните да пријавуваат штети

Од Општина Центар ги повикаа жителите и понатаму да пријавуваат паднати или оштетени дрвја, оштетувања на инфраструктурата и други ризични ситуации.

Екипите ќе останат на терен, а интервенциите ќе се извршуваат според степенот на опасност и според пријавите од граѓаните.

Силното невреме во Скопје предизвика паднати дрвја, оштетени возила, покриви и друга материјална штета, а Центарот за управување со кризи регистрираше повеќе од 1.000 повици од граѓани.