Фудбалската репрезентација на Уругвај се најде во сериозни проблеми на Светското првенство откако ремизираше 2:2 против Зеленортските Острови и пропушти голема можност да стигне до првата победа на турнирот. Најконтроверзниот момент се случи во 68. минута, кога Уругвај постигна гол за водство и големо славје. Сепак, по интервенција од ВАР-собата, погодокот беше поништен поради несекојдневна офсајд-ситуација.

По изведен корнер од Максимилијано Араухо, топката се одби назад кон него. Уругваецот повторно ја прими и центрираше во шеснаесетникот, по што настана голема мешаница пред голот на Зеленортските Острови и топката заврши во мрежата. Иако на гол-линијата стоеше дефанзивец на африканската селекција, судиите по прегледувањето на снимката утврдија дека еден фудбалер на Уругвај бил во офсајд. Причината била тоа што во моментот на упатување на топката едната негова нога се наоѓала надвор од теренот, зад гол-аут линијата, поради што се сметал за играч кој активно учествува во акцијата од недозволена позиција.

Поништениот гол ги чинеше Уругвајците два драгоцени бода. Натпреварот инаку понуди многу возбудувања. Зеленортските Острови поведоа во 21. минута преку Кевин Пина Ленини, кој го постигна првиот гол во историјата на својата репрезентација на Светските првенства.

Уругвај возврати пред паузата со головите на Максимилијано Араухо во 44. минута и Агустин Канобио во судиското продолжение на првото полувреме за пресврт од 2:1. Во вториот дел Елио Варела ја искористи големата грешка на одбраната на Уругвај и во 61. минута израмни на 2:2, резултат кој остана до крајот.

По две кола во групата, Шпанија е лидер со четири бода, додека Зеленортските Острови и Уругвај имаат по два. Саудиска Арабија е последна со еден бод. Во последното коло Уругвај го очекува тежок дуел против Шпанија, додека Зеленортските Острови ќе се соочат со Саудиска Арабија во битката за пласман во нокаут-фазата.