Израелскиот премиер Бенјамин Нетанјаху ѝ наредил на израелската армија да ја прошири контролата врз Појасот Газа и да заземе околу 70 проценти од палестинската територија, и покрај примирјето што претходно беше договорено со посредство на САД.
Во моментов, Израел контролира околу 64 проценти од Газа, територија која беше речиси целосно уништена за време на двегодишната офанзива што следуваше по нападот на Хамас врз јужен Израел во 2023 година.
Примирје кое не ги запре нападите
Според договорот за примирје постигнат во октомври, израелските сили требаше да се повлечат до таканаречената „жолта линија“, која го означуваше просторот под нивна контрола. Со тој договор Израел контролираше околу 53 проценти од Газа, додека остатокот беше под власт на Хамас.
Сепак, според извештај на Reuters, Израел дополнително ги поместил бетонските бариери што ја означуваат границата на контролата подлабоко во територијата. Воени мапи објавени во март покажале уште поголема ограничена зона, која аналитичарите ја проценуваат на околу 64 проценти од територијата на Газа.
„Одиме чекор по чекор“
Говорејќи во населба на окупираниот Западен Брег, Нетанјаху изјави дека Израел постепено ќе ја зголемува контролата врз Газа.
„Бевме на 50 проценти, преминавме на 60. Мојата директива е да стигнеме до 70 проценти. Одиме чекор по чекор. Ги притискаме од сите страни“, изјави Нетанјаху.
Тој териториите што Израел ги зазел во Газа, Сирија и Либан ги опиша како „тампон-зони“ кои треба да спречат потенцијални напади на милитантни групи.
Палестинците стравуваат од трајно раселување
Палестинците ваквото ширење на израелската контрола го гледаат како дел од стратегија за трајно раселување на населението од Газа. Посочуваат и на изјави на израелски министри кои зборувале за поттикнување „доброволна миграција“ од територијата.
Во меѓувреме, Израел ги интензивира нападите врз Газа, тврдејќи дека цел на операциите се високи функционери на Хамас поврзани со нападите од 2023 година. Израелската армија во вторникот го ликвидирала лидерот на вооруженото крило на Хамас, само десет дена по убиството на неговиот претходник.
Жртви за време на Курбан-бајрам
Според здравствените власти во Газа, во напад извршен во средата вечерта загинале најмалку десет лица, меѓу кои и пет деца, додека уште 18 биле повредени.
Нападот се случил додека Палестинците го одбележувале Курбан-бајрам, кој многумина во Газа го дочекале во бегалски кампови и уништени згради. Здравствените власти наведуваат дека од почетокот на примирјето досега во израелските напади загинале повеќе од 900 луѓе, додека Израел тврди дека во истиот период милитанти убиле четворица израелски војници.
Израел и Хамас и натаму не можат да постигнат договор околу американскиот план за Газа, кој предвидува повлекување на израелските сили и разоружување на Хамас.
