Бразилскиот фудбалер Нејмар привлече внимание во јавноста откако покажа ретки приватни снимки од прославата по освојувањето на Лигата на шампионите во 2015 година. Во кадри од документарниот серијал на Нетфликс, тој откри како заедно со Луис Суарез и видно расположениот Лионел Меси славеле веднаш по победата во Берлин, признавајќи дека целото напаѓачко трио тогаш било под силно дејство на алкохол.
Архивските кадри се дел од серијалот „Нејмар: Совршен хаос“, каде бразилскиот напаѓач на својот телефон прегледува стари видеозаписи од соблекувалната и приватната забава. На видеото се гледа како Нејмар и Суарез танцуваат, а по кусо време им се приклучува и насмеаниот Меси, облечен со необична капа и очила за сонце.
Аргентинецот ретко се појавува во вакви опуштени изданија во јавноста. Додека го гледаше материјалот, Нејмар низ гласна смеа ја опиша атмосферата од таа вечер: „Гледајте го Меси како танцува! Суарез, Меси и јас. Бевме целосно пијани.“
Овие сцени настанаа веднаш по финалниот натпревар во Берлин, каде Барселона го совлада Јувентус со 3:1. Шпанскиот клуб поведе со голот на Иван Ракитиќ, Алваро Мората израмни за италијанскиот тим, а победата и европската титула ја потврдија токму Суарез и Нејмар со погодоци во вториот дел од средбата.
Со таа победа Барселона стигна до својот петти трофеј во елитното натпреварување. Таа вечер каталонскиот тим ја комплетираше втората трикратна круна во клупската историја, откако претходно ги освои шпанското првенство и Купот на кралот.
Напаѓачкиот тандем МСН функционираше на теренот од 2014 до 2017 година и важи за една од најефикасните офанзивни линии во модерниот фудбал. Уште во првата заедничка сезона тројцата играчи ги освоија сите клучни пехари.
Заедничката ера заврши во летото 2017 година, кога Нејмар се пресели во Пари Сен Жермен за рекордни 222 милиони евра, трансфер кој сè уште е најскап во фудбалот. Суарез си замина од „Камп Ноу“ во 2020 година со трансфер во Атлетико Мадрид, додека Меси го напушти клубот една година подоцна.
