Ако ви е преку глава од сообраќајот, гужвите и постојаната бучава, можеби следниот одмор треба да го поминете на место каде тишината е дел од секојдневието. Ново истражување открива кои земји нудат најдобри услови за вистинско бегство од бучавата и забрзаниот начин на живот.
Кога последен пат сте биле некаде каде што навистина било тивко? Автомобили, разговори, сообраќај и останатите звуци од секојдневието станаа толку вообичаени што вистинската тишина често ја забележуваме дури кога ќе се оддалечиме од градот.
Токму затоа новата анализа Noise-Free Nations ги рангира земјите во кои е најлесно да се најдат мир, простор и тишина.
Индексот, изработен од туристичката компанија Go2Africa, го поставува Бутан на првото место во светот, додека Естонија е најдобро рангираната европска држава.
Како се мери тишината?
При составувањето на индексот биле анализирани повеќе фактори кои влијаат врз бучавата и чувството на изолираност.
Меѓу нив се густината на населението и туристите, уделот на руралните области, површината на заштитено земјиште, како и густината на моторни возила, аеродроми и железнички линии.
Врз основа на овие показатели, секоја земја добила оценка од 0 до 100. Колку е повисока оценката, толку земјата се смета за потивка.
Бутан е најтивката земја во светот
Со резултат од 89,44 поени, Бутан го зазема првото место.
Земјата е позната по огромните шумски и планински пространства, долините и големиот удел на рурални области. Дополнително, Бутан го ограничува масовниот туризам преку надомест за одржлив развој.
Второто место го зазема Намибија, со само 3,83 жители на квадратен километар. Таму се наоѓа и Намиб, една од најстарите пустини во светот, а релативно малиот број туристи дополнително придонесува за високото место на листата.
На третото место е Боцвана, а меѓу првите пет се и Замбија и Габон.
Африканските земји доминираат во рангирањето – повеќе од половина од првите 25 држави се наоѓаат на овој континент.
Европа не влезе ниту меѓу првите 25
Ниту една европска држава не успеала да се најде меѓу 25-те најтивки земји во светот.
Најдобро рангирана е Естонија на 34. место, по што следуваат Финска на 39. и Шведска на 40. место.
Според авторите на индексот, една од причините е поголемата густина на населението во Европа, развиената транспортна инфраструктура и големиот број туристи.
Десетте најтивки земји во светот
- Бутан – 89,44
- Намибија – 86,69
- Боцвана – 80,86
- Замбија – 80,64
- Габон – 80,61
- Венецуела – 80,20
- Чад – 79,82
- Централноафриканска Република – 78,18
- Монголија – 75,53
- Боливија – 75,40
А каде е најбучно?
На спротивниот крај на листата се земјите во кои, според користените критериуми, е најтешко да се избега од гужвата и бучавата.
Сингапур е на последното место, со само 6,78 поени. Руралните области зафаќаат мал дел од неговата територија, а густината на населението и туристите е исклучително висока.
Изненадување може да биде второто место на Малдивите, дестинација која најчесто се поврзува со мир, тишина и одмор. Сепак, главниот град Мале е еден од најгусто населените простори во светот.
Следува Барбадос, каде врз резултатот влијаат бројот на аеродроми во однос на големината на земјата и сообраќајот поврзан со крузерите.
Петте најбучни земји според индексот се:
- Сингапур – 6,78
- Малдиви – 8,48
- Барбадос – 10,12
- Катар – 15,45
- Либан – 18,13
За оние што следниот одмор сакаат да го поминат далеку од сообраќај, туристички гужви и постојана бучава, листата покажува дека најмирните места можеби треба да се бараат подалеку од големите европски туристички центри – од планините на Бутан до пустините на Намибија.
