Порастот на температурите и климатските промени влијаат врз движењето на најотровните змии во светот, покажува ново истражување на Светската здравствена организација. Според научниците, сè повеќе опасни видови ќе ги напуштаат своите природни живеалишта и ќе се приближуваат до густо населени области во потрага по попогодни услови за живот.

Истражувањето објавено во списанието PLOS Neglected Tropical Diseases предупредува дека змиите би можеле да се појавуваат и во региони каде досега речиси и немало вакви опасни влекачи. Ова значително го зголемува ризикот од средби меѓу луѓето и змиите, а со тоа и бројот на каснувања.

Меѓу видовите кои најверојатно ќе ги менуваат своите живеалишта се црната мамба во Африка, краитите во Азија, водените мокасинки во Северна Америка, како и одредени видови кобри и поскоци. Научниците проценуваат дека милиони луѓе би можеле да бидат изложени на поголем ризик, особено во сиромашните рурални подрачја каде медицинската помош е тешко достапна.

Истовремено, климатските промени претставуваат закана и за самите змии. Некои видови би можеле да останат без природни живеалишта поради уништување на шумите, мочуриштата и тревните површини, што во екстремни случаи може да доведе и до нивно исчезнување.

Експертите предупредуваат дека во иднина змиите почесто би можеле да се среќаваат во близина на обработливи полиња, извори на вода, паркови и детски игралишта. Најголем ризик се очекува во делови од Азија, Африка и Јужна Америка, каде секоја година се регистрираат милиони случаи на каснување од змии.