Доколку барате поинаков одмор, хотелот „Skylodge Adventure Suites“ во Перу е едно од најнеобичните места за престој во светот. Наместо класична хотелска соба, гостите ноќеваат во проѕирни капсули кои висат на речиси 400 метри над Светата долина на Инките.

Хотелот се наоѓа во близина на градот Ољантајтамбо, на околу еден час возење од Куско. До сместувањето не се стигнува со лифт или хотелски ходник, туку со искачување по обезбедена карпеста патека (via ferrata) или со систем од челични сајли. При враќањето, посетителите најчесто користат зип-лајн, што дополнително ја зголемува авантурата.

Комплексот располага со три панорамски капсули во кои можат да престојуваат до осум гости. Најчесто ги избираат парови, љубители на адреналински активности и патници кои сакаат уникатни искуства.

Секоја капсула е опремена со удобни кревети, трпезариски простор и приватен тоалет, а електричната енергија се добива преку соларни панели. Во цената се вклучени гурманска вечера и појадок, додека вечерите нудат спектакуларен поглед кон ѕвезденото небо, а утрата незаборавно изгрејсонце над Андите.

Цената за престој започнува од околу 400 евра по лице, во зависност од избраниот пакет и сезоната.