Во Лондон беше поставен нов светски рекорд за најдолго тирамису, откако стотина италијански готвачи за време на викендот подготвија десерт долг 440,6 метри. Настанот се одржа во општинската сала во Челси, со што беше надминат претходниот рекорд од 273,5 метри поставен во Милано.
Според правилата на Гинисовата книга на рекорди, тирамисуто морало да биде подготвено и составено на самото место. За неговата изработка биле искористени повеќе од 3000 јајца и околу 50.000 пишкоти, а официјалните судии го потврдија новиот рекорд. Десертот морал да ги исполнува и стандардите за висина и ширина за да биде признаен.
Организаторот на настанот истакна дека овој подвиг има и симболично значење, бидејќи е посветен на британското кралско семејство. Огромното тирамису било украсено со златна круна, како знак на почит кон домаќините.
Готвачите нагласија дека успехот е резултат на тимска работа и ентузијазам, а целиот настан привлече големо внимание. Според нив, тајната на добро тирамису лежи во квалитетното кафе, цврстата крема и страста при подготовката.
