Меѓународниот монетарен фонд (ММФ) ја намали прогнозата за растот на светската економија за 2026 година, наведувајќи дека војната во Иран и нестабилноста на енергетските пазари ќе имаат значително влијание врз глобалниот економски развој. Според најновите процени, светската економија годинава ќе порасне за три проценти, што е помалку од претходната прогноза од 3,1 процент и под минатогодишниот раст од 3,5 проценти.

Во извештајот се наведува дека негативните последици од конфликтот и енергетската криза делумно се ублажуваат благодарение на забрзаниот развој на вештачката интелигенција и другите современи технологии, кои придонесуваат за зголемување на продуктивноста во дел од економските сектори.

ММФ предупредува дека тензиите околу Ормускиот Теснец, низ кој се транспортира околу една петтина од светската нафта, може да предизвикаат раст на цените на горивата за речиси 32 проценти. Истовремено, глобалната инфлација во 2026 година би можела да достигне 4,7 проценти, што би означило застој во досегашниот напредок во намалувањето на инфлацијата.

Проекциите се темелат на претпоставката дека Ормускиот Теснец повторно ќе биде целосно отворен во текот на овој месец и дека меѓународната трговија постепено ќе се нормализира до март следната година.

Според прогнозите, економијата на САД ќе забележи раст од 2,3 проценти, што е непроменето во однос на априлската процена. Земјите од еврозоната, пак, се очекува да остварат заеднички економски раст од 0,9 проценти, под влијание на високите цени на енергенсите. Кина, втората најголема светска економија, според ММФ ќе порасне за 4,6 проценти, што е помалку од минатата година, но нешто подобро од претходните очекувања.