Пејачот, актер и филмски продуцент Мик Џегер е роден на 26 јули 1943 година во Дартфорд, Англија. Иако ги започна своите студии на познатата Лондонска школа за економија, тој го напушти академскиот свет за да ги формира Ролинг Стоунс. Заедно со Брајан Џонс, Кит Ричардс и Ијан Стјуарт, го започна патувањето што ја промени рок музиката засекогаш.

Фронтменот на Ролинг Стоунс брзо стана една од најпрепознатливите фигури на светската сцена. Бендот создаде безвременски хитови како „(I Can’t Get No) Satisfaction“, „Jumpin’ Jack Flash“ и „You Can’t Always Get What You Want“. Покрај музичкиот успех, неговиот приватен живот и динамичното темпо со децении го привлекуваа вниманието на светската јавност.

Џегер не застана само на музичките сцени. Неговото филмско деби беше во остварувањето „Performance“ од 1969 година, а следната година ја играше главната улога во филмот за австралискиот одметник Нед Кели. Подоцна се појави и во наслови како „Freejack“, „Bent“ и „The Man from Elysian Fields“. Во 1995 година ја основа и својата продуцентска куќа „Jagged Films“, која го продуцираше воениот филм „Enigma“.

Неговата авторска музика ги одбележа кинематографските класици. Песните на Ролинг Стоунс се дел од филмовите „Apocalypse Now“, „Goodfellas“ и „Jerry Maguire“. За песната „Old Habits Die Hard“ од филмот „Alfie“ во 2004 година, Џегер освои Златен глобус. Животот на бендот е забележан и во култните документарци „Gimme Shelter“ од 1969 година и „Shine a Light“ во режија на Мартин Скорсезе.