Грчкиот премиер Киријакос Мицотакис заврши во болница со полесни повреди по пад од велосипед за време на неговиот одмор на островот Крит. Незгодата се случила за време на неговата редовна велосипедска рута, по што Мицотакис превентивно бил пренесен во Општата болница во Ханја. Од неговиот кабинет соопштија дека тој е во добра здравствена состојба и дека брзо се вратил на планираните дневни активности.

Грчкиот премиер Киријакос Мицотакис, кој е познат како љубител на велосипедизмот и активностите на отворено, ги минувал слободните денови на родниот остров Крит. За време на утринското возење на планински терен, тој загубил контрола и паднал од велосипедот.

По инцидентот, Мицотакис веднаш бил пренесен во болницата во Ханја каде што му била укажана медицинска помош. Докторите извршиле детален преглед и констатирале само полесни гребнатини и повреди, по што тој веднаш бил пуштен на домашно лекување.

И покрај малиот инцидент, премиерскиот кабинет потврди дека ова нема да влијае врз планираните обврски на шефот на грчката влада. Мицотакис веќе се вратил во својата резиденција на Крит и ги продолжил работните средби и активности предвидени за овој период.

Ова не е првпат грчкиот премиер да биде во фокусот на јавноста поради неговиот спортски дух. Мицотакис често користи велосипед за време на викендите и одморите, промовирајќи активен начин на живот дури и за време на службените патувања.