Американскиот актер Метју Меконахи откри дека доколку треба да го избере својот последен оброк во животот, на трпезата задолжително би се нашла и тестенината од хрватскиот ресторан „Менегети“ во истарското место Бале. Оскаровецот го издвои ова јадење за време на гостувањето во популарната емисија „Last Meals“ на Јутјуб каналот „Mythical Kitchen“, потсетувајќи се на вкусовите што ги пробал за време на неговиот престој во Хрватска со сопругата Камила Алвес.

Јадењето што оставило траен впечаток кај холивудскиот актер се тонарели подготвени со големи црвени ракчиња (Gambero Rosso), крем од кафе и кафеав путер. Станува збор за авторски специјалитет од менито на винаријата и ресторан „Менегети“, кој комбинира свежа тестенина со интензивни ароми.

Според споделените впечатоци, Меконахи по посетата на Истра најавил дека лично ќе им го препорача ова јадење на своите колеги во филмската индустрија. Неколку години подоцна, тој покажа дека вкусот сè уште му е свеж во сеќавањето, ставајќи го рамо до рамо со неговите долгогодишни домашни фаворити.

Концептот на серијалот бара од гостите да состават целосна трпеза од јадења што најмногу ги сакаат, а изборот на Меконахи опфати баланс меѓу ресторански деликатеси и семејна храна.

Покрај истарската тестенина, актерот на своето замислено последно мени нарача класичен чизбургер, тестенини со болоњезе сос, како и зелка-салата (coleslaw) по рецептот на неговата сопруга Камила.