Компанијата Meta разгледува можност да ги изгаси своите услуги во Ново Мексико како одговор на барањата на државното обвинителство за темелни промени на нејзините платформи, меѓу кои Instagram, Facebook и WhatsApp. Целта на барањата е поголема заштита на менталното здравје и безбедноста на децата.
Правниот спор се води пред судење без порота, кое треба да почне следната недела. Meta е обвинета дека нејзините платформи претставуваат јавна штета, а случајот веќе резултираше со граѓанска казна од 375 милиони долари, откако порота претходно утврди дека компанијата свесно му штетела на менталното здравје на децата и прикривала сознанија за злоупотреба на деца на своите платформи.
Обвинителите бараат судот да наложи промени на детските профили на социјалните мрежи. Меѓу барањата се ограничување на функции што поттикнуваат зависничко користење, подобра проверка на возраста, построги стандардни поставки за приватност и засилен надзор за спречување злоупотреба на деца.
Од Meta, пак, тврдат дека компанијата постојано ја подобрува безбедноста на децата и работи на намалување на компулсивното користење на социјалните мрежи. Раководството смета дека Meta е неправедно издвоена меѓу стотици апликации што ги користат тинејџерите.
Во судски поднесок објавен во четвртокот, Meta наведе дека е неизводливо да се исполни барањето за 99-процентна точност при проверка дали корисниците имаат најмалку 13 години.
„Во практична смисла, ова барање ја принудува Meta или да ги изгаси своите услуги за сите корисници во државата, или да се придржува до невозможни обврски“, стои во поднесокот.
Таков потег би ги погодил околу 2,1 милион жители на Ново Мексико и би ја прекинал личната комуникација преку платформите на Meta. Би бил погоден и деловниот сектор, особено компаниите што ги користат Facebook, Instagram и WhatsApp за рекламирање и комуникација со клиенти.
Ерик Голдман, ко-директор на Институтот за високотехнолошко право на Универзитетот „Санта Клара“, оценува дека повлекувањето на Meta од Ново Мексико формално би ги решило грижите околу штетата врз децата, но би можело да изгледа како намерно непријателски потег и да предизвика сериозни последици.
Тој потсети на случајот од 2023 година, кога канадските власти го обвинија Facebook дека го става профитот пред јавната безбедност, откако платформата блокираше локални вести за време на големи пожари и евакуации. Facebook тогаш реагираше на нов закон што бараше технолошките компании да им плаќаат на издавачите за пренесување вести.
Случајот во Ново Мексико е првиот што стигна до судење меѓу повеќе од 40 тужби поднесени против Meta од државни обвинители во САД. Во нив се тврди дека платформите на компанијата придонесуваат за кризата со менталното здравје кај младите.
Државниот обвинител на Ново Мексико, Раул Торез, изрази сомнеж дека Meta навистина е подготвена да ги изгаси услугите во целата држава.
„Длабоко се сомневам дека се подготвени и способни да го изгасат својот производ во цела држава“, рече Торез на онлајн прес-конференција.
Тој ги отфрли аргументите на Meta дека предложените промени се непрактични, потсетувајќи дека порано платформите функционирале без бесконечно скролање и автоматско пуштање содржини.
Торез порача дека нема да „затвора очи“ пред ризиците за децата во Ново Мексико само затоа што некој има договор за рекламирање.
Ново Мексико бара и сите детски профили на платформите на Meta да бидат поврзани со родител или старател, како и да биде назначен судски надзорник за безбедност на децата, кој би го следел напредокот.
Надвор од САД, повеќе земји веќе воведуваат или планираат ограничувања за онлајн активностите на децата. Случајот во Ново Мексико затоа може да стане важен тест за тоа колку далеку можат да одат државите во регулирањето на социјалните мрежи — и дали големите технолошки компании ќе изберат прилагодување или повлекување.
