Топлотните бранови и климатските промени засилени од феноменот Ел Нињо предизвикуваат масовно уривање и изумирање на ретките меки корали во Јужна Кореја. Локалните нуркачи и научниците алармираат дека колониите под заштита на УНЕСКО во водите околу јужниот остров Џеџу брзо ја губат бојата и способноста да се опорават. Проблемот се продлабочува со секоја нова сезона на екстремни температури.
Нуркачката Мјеонг-хјо Ко, која со години нурка крај брегот на островот Џеџу во потрага по морски плодови, сведочи за драматичната промена под површината. Она што порано било подводен пејзаж исполнет со живи бои, денес сè почесто наликува на пустош.
„Беше застрашувачки кога сфатив дека целата градина со корали се урива и станува бела“, раскажува Ко за промените што ги забележала по две години непрекинат пораст на температурата на водата.
Граѓанскиот научен центар „Паран оушн“ (Paran Ocean Citizen Science Center), група нуркачи што врши редовен мониторинг врз колониите околу ненаселените карпести островчиња јужно од Џеџу, потврдува дека истото масовно слегнување се повторува и оваа година. Овие корални гребени се наоѓаат на листата за заштита на светското природно наследство.
Физиологијата на меките корали ги прави исклучително ранливи на брзи термички промени. За разлика од тврдите корали чија структура ја држат цврсти скелети од калциум карбонат, меките корали се потпираат на внатрешен хидростатски притисок на течноста за да останат исправени.
Кога морската вода претерано ќе се загрее, биолошката рамнотежа се нарушува, коралите го губат внатрешниот притисок, омекнуваат и на крајот се уриваат под сопствената тежина. Истражувачите на терен објаснуваат дека циклусите на оштетување станале премногу чести за организмите да можат да преживеат.
„Ако се случи уште едно слегнување од големи размери, коралите обично само делумно се опоравуваат, а потоа многу од нив се кршат и одново пропаѓаат. Тоа се повторува континуирано, но нивната способност за регенерација со тек на време е сè помала“, вели истражувачката Ким Таихун.
Без стабилен период на пониски температури, природниот циклус на обновување на гребените целосно исчезнува.
