Во канадскиот главен град Отава, од 23 до 29 април ќе се соберат делегати од 174 земји на собирот формално познат како Четврта сесија на Меѓувладиниот преговарачки комитет за борба против загадувањето од пластика.
„И луѓето и планетата длабоко страдаат од ефектите на загадувањето предизвикано од пластиката“, вели Џиоти Матур-Филип, извршен секретар на ИНЦ. „Оваа преговарачка сесија е можност да се постигне значителен напредок и цврст договор што ќе им овозможи на идните генерации да живеат во свет без пластично загадување“.
Преговорите доаѓаат во време на она што експертите го нарекоа „растечка пластична криза“.
Од 1950-тите, се произведени 9,2 милијарди тони пластика, од кои 7 милијарди тони станаа отпад, полнејќи ги депониите и загадувајќи ги езерата, реките, почвата и океанот. Човештвото сега произведува 430 милиони тони пластика годишно, од кои две третини се содржани во краткотрајни производи кои наскоро стануваат отпад. Дел од таа пластика е дел од синџирот на исхрана, каде што има потенцијал да му наштети на здравјето на луѓето.
„Науката е јасна, а решенијата ни се достапни за да се стави крај на загадувањето со пластика. Со оглед на тоа што човештвото е на пат да ја зголеми тројно количината на пластика што ја произведуваме годишно до 2060 година, од витално значење е да продолжиме да постигнуваме конкретен напредок и да постигнеме договор до крајот на оваа година“ , сметаат експертите.
