По елиминацијата на Германија од Светското првенство, се отвори нова контроверзна дебата околу условите во репрезентативниот камп, во која се вклучија поранешниот капитен и освојувач на „Златната топка“, Лотар Матеус, како и Кети Хумелс, поранешната сопруга на репрезентативецот Мац Хумелс. Германија во групната фаза забележа победи над Курасао (7:1) и Брегот на Слоновата Коска (2:1), но загуби од Еквадор (2:1). Во осминафиналето, по изведување пенали, беше елиминирана од Парагвај.

Матеус: „Семејствата создадоа напнатост“

Матеус изјави дека присуството на семејствата во кампот создало дополнителен притисок и внатрешни тензии.

„Не разбирам зошто сите членови на семејството мора да бидат таму од првиот ден“, порача тој, додавајќи дека тоа го одвлекува фокусот од натпреварите.

Кети Хумелс, која го следеше Мац Хумелс на Светските првенства во 2014 и 2018 година, делумно се согласи со Матеус. Таа смета дека обемните семејни посети на почетокот од турнирот можат да создадат хаос во тимот, особено кај младите играчи кои сè уште учат да се справуваат со притисок.

Според неа, контактот со семејството треба да дојде како „награда“ подоцна во турнирот, кога тимот веќе ќе постигне резултати. Изјавите отворија нова дебата во германската спортска јавност, дали психолошкиот и семејниот баланс може да влијае на резултатите на големите турнири, или станува збор за барање изговор по раната елиминација.