Еврокомесарката за проширување Марта Кос денес пристигнува во Приштина, каде ќе има средби со претставници на косовските институции во технички мандат. Посетата е прва на Косово откако Кос ја презеде функцијата еврокомесарка за проширување на крајот од 2024 година.

Според најавите од Европската комисија, Кос треба да се сретне со вршителката на должност претседател на Косово, Аљбуљена Хаџиу, и со премиерот во технички мандат, Аљбин Курти. Главна тема на разговорите ќе биде потребата од брзи реформи што треба да го забрзаат европскиот пат на Косово.

Посетата доаѓа во чувствителен политички момент за Приштина, по период на институционална неизвесност и одложувања. Кос требаше да го посети Косово уште во март, но таа посета беше откажана по распуштањето на косовското Собрание.

Европски извори претходно посочуваа дека отсуството на посета на Косово се поврзувало со недостигот на целосно функционални институции во земјата. Сепак, Брисел оценува дека дијалогот со Приштина мора да продолжи, особено во делот на реформите, владеењето на правото и европската интеграција.

Косово останува меѓу најчувствителните прашања во политиката на проширување на Европската Унија, особено поради односите со Србија, потребата од нормализација и условите за напредок кон ЕУ. Посетата на Кос се чита како сигнал дека Брисел сака повторно да го стави фокусот врз реформите и институционалната стабилност во Приштина.