Мароко е првата репрезентација што обезбеди место во четвртфиналето на Светското првенство, откако во Хјустон убедливо ја совлада Канада со 3:0. Херој на победата беше Азедин Оунахи, кој двапати се запиша во листата на стрелците, во 50. и 82. минута, додека конечните 3:0 ги постави Суфијан Рахими во осмата минута од судиското продолжение.

Македонската публика имаше дополнителна причина да го следи натпреварот, бидејќи фудбалерот на Хајдук, Нико Сигур, беше стартер за Канада и на теренот остана до 88. минута.

Канада доминираше, но Боно беше несовладлив

Канадската репрезентација многу подобро го отвори натпреварот и уште во првите десет минути создаде две одлични шанси преку Џонатан Дејвид и Тани Олувасеји, но мароканскиот голман Јасин Боно со две извонредни интервенции го сочува својот гол. Во првото полувреме Канада ја контролираше играта, додека Мароко тешко создаваше опасни акции. Натпреварот беше исполнет со остри дуели, а до паузата беа покажани дури шест жолти картони.

Оунахи ја реши средбата

Мароко го отвори резултатот веднаш на стартот од второто полувреме. Во 50. минута, по добро изведен слободен удар од Ашраф Хакими, Оунахи прецизно шутираше од работ на шеснаесетникот и донесе водство од 1:0. Канада се обидуваше да се врати во игра, но не ги искористи своите можности, што беше казнето во 82. минута. Брахим Дијаз повлече брз контранапад, го проигра Оунахи, кој со својот втор погодок практично го реши победникот.

Во судиското продолжение, повторно по контранапад, Дијаз му асистираше на Рахими, кој ги постави конечните 3:0. Мароко во четвртфиналето ќе игра против победникот од натпреварот меѓу Франција и Парагвај.