Францускиот претседател Емануел Макрон, британскиот премиер Кир Стармер и германскиот канцелар Фридрих Мерц ќе се сретнат задутре со украинскиот претседател Володимир Зеленски, соопшти денес Елисејската палата. „Средбата ќе им овозможи да продолжат со тесна координација на нашата заедничка програма за понатамошна поддршка на Украина и зголемен притисок врз руските воени напори“, се вели во соопштението.

„Русија се соочува со воен, економски и стратешки неуспех, а на фронтот истрајува во смртоносна војна без успех“, се додава во соопштението. Средбата треба да се одржи во Лондон. Зеленски сака европските лидери да ги засилат напорите за да помогнат во завршувањето на војната во Украина, бидејќи е загрижен дека американскиот претседател Доналд Трамп е преокупиран со Иран.

„Она што недостасува е волјата на Путин“

Во отворено писмо објавено вчера , украинскиот лидер го покани рускиот претседател Владимир Путин на состанок за преговори за завршување на војната што трае повеќе од четири години. Кремљ соопшти дека Путин бил информиран за содржината на писмото.

„Секогаш сме се залагале за директни преговори меѓу Украина и Кремљ… Верувам дека Украина и Русија се оние кои можат да изградат и прекин на огнот и мировен план, а Европејците се оние кои можат да помогнат во тоа“, изјави денес Макрон. „Отворени сме за дијалог, она што недостасува е волјата на Путин“, изјави Мерц во Црна Гора.