Португалскиот уметник Луис Филипе Родригез утре, 5 ноември, ќе ја отвори својата самостојна изложба „Од планината до морето“ во галеријата ОСТЕН во Скопје. Преку големи апстрактни цртежи, уметникот ги истражува природните пејзажи, претворајќи ги планинските гребени, морските бранови и движењето на ветерот во илјадници прецизни линии.

Изложбата е замислена како визуелно патување од планинските текстури до бескрајните морски хоризонти. Делата се создадени со графит на акварелна хартија, а некои достигнуваат ширина поголема од два метра.

Илјадници линии што создаваат пејзаж

Родригез користи едноставна техника на повторување и натрупување линии, со која создава сложени визуелни композиции.

Од далечина, неговите дела наликуваат на морски бранови, планински масиви или топографски карти. Одблизу, пејзажите се претвораат во густ сплет од поединечни потези, зад кои стојат стотици часови работа.

„Не ја цртам планината; го цртам времето потребно за нејзино искачување. Не го цртам морето; го цртам ритамот на неговите бранови“, се наведува во кураторскиот текст.

Поставката опфаќа два тематски сегмента. Првиот, „Хоризонтот“, претставува панорамски пејзажи со линии што се преклопуваат и брануваат, додека вториот, „Квадратот и длабинскиот фокус“, го насочува вниманието кон густината и текстурата на цртежот.

Уметник со меѓународна кариера

Луис Филипе Салгадо Переира Родригез е португалски уметник, истражувач и доцент на Архитектонскиот факултет при Универзитетот во Лисабон.

Досега учествувал на 115 групни изложби во повеќе земји, меѓу кои Португалија, Северна Македонија, Шпанија, Холандија, Кина, Јужна Кореја, Италија и Канада, а реализирал и 17 самостојни изложби.

Добитник е на повеќе уметнички признанија, меѓу кои и првата награда на натпреварот за пластични уметности „INATEL“ во 2015 година.

Покрај уметничкото творештво, Родригез се занимава и со научноистражувачка работа во областа на архитектурата, визуелните уметности, естетиката и креативноста.

Изложбата „Од планината до морето“ ќе биде отворена на 5 ноември, во 19 часот, во галеријата ОСТЕН во Скопје.