Фронтменот на бендот Oasis, Лијам Галагер, јавно ја критикуваше забавната програма на полувремето од финалето на Светското првенство меѓу Шпанија и Аргентина. Паузата инспирирана од Супербоул траеше речиси половина час, предизвикувајќи бурни реакции кај навивачите и фудбалските легенди кои сметаат дека ваквиот концепт го оддалечува натпреварувањето од традиционалниот спортски формат.

Полувремето, каде што беше вклучена забавната програма траеше точно 27 минути и 19 секунди. Концептот, осмислен од фронтменот на бендот Coldplay Крис Мартин, донесе настапи на Мадона, BTS, Шакира и Џастин Бибер. Овој потег предизвика критики кај љубителите на фудбалот поради невообичаено долгиот прекин на играта.

Пејачот на бендот Oasis не штедеше зборови на социјалната мрежа X, нарекувајќи го настанот лош трип и тотално помрачување на умот. На коментар од обожавател дека неговиот бенд би издоминирал на ваков настан, Галагер одговори дека воопшто не се работи за нив, туку за целосното лудило на концептот. Тој во свој стил додаде дека за среќа ги облекол забавните чорапи, бидејќи во спротивно шоуто целосно би го исфрлило од такт.

Иако генерално го исмеа спектаклот, британскиот музичар неочекувано застана во одбрана на Џастин Бибер. Галагер ја пофали неговата акустична изведба на песната Everything Hallelujah. Кога еден корисник праша кој мислел дека акустичен настап на Бибер е добра идеја, музичарот кратко напиша „ЈАС“, додавајќи дека канадскиот пејач е закон.

Незадоволството го сподели и поранешниот англиски репрезентативец Вејн Руни. Во улога на стручен коментатор за телевизијата BBC, тој го нарече шоуто „обично срање“. Руни појасни дека ги почитува изведувачите, но настапот бил премлак и единствено сакал натпреварот да продолжи.

Дел од навивачите стравуваат дека ФИФА забрзано го американизира спортот, користејќи ги дури и паузите за хидратација како простор за нови реклами.