Со доаѓањето на пролетта, најголем дел од вниманието во градината обично оди кон садење, пресадување и планирање нови цветни комбинации. Но април не е важен само за тоа. Овој месец е и еден од најдобрите периоди за кроење, постапка што често се занемарува, а има големо значење за здравјето и изгледот на растенијата.
Токму сега многу растенија влегуваат во фаза на засилен раст, па со правилно кроење нивната енергија може да се насочи кон нови изданоци и пообилно цветање.
Кроењето не служи само за уреден изглед. Со отстранување на сувите, оштетените и прегустите гранки се подобрува проветрувањето, се намалува ризикот од болести и се поттикнува формирањето нови пупки. Резултатот се поздрави растенија, поинтензивни бои и цветови што траат подолго.
Меѓу растенијата што особено имаат корист од априлското кроење се розите. Во овој период се отстрануваат сувите, оштетените и слабите гранки, како и оние што растат кон внатрешноста на грмушката. Здравите изданоци се кратат над надворешен пуп, за да се поттикне раст нанадвор. Така растението добива повеќе светлина и воздух, што подоцна носи посилен раст и повеќе цветови.
И лавандата, иако важи за издржливо растение, сака лесна пролетна нега. Во април најчесто се отстрануваат сувите врвови и внимателно се обликува грмушката, без да се навлезе предлабоко во дрвенестиот дел. Со редовно кроење таа останува компактна и во лето дава повеќе цветови.
Кај хортензиите, пак, важно е најпрво да се знае за кој вид станува збор. Оние што цветаат на нови изданоци можат послободно да се кројат, дури и поинтензивно, за да се поттикне развојот на големи цветни топки. Кај сортите што цветаат на старо дрво, се препорачува само отстранување на сувите цветови и оштетените гранки.
Пеларгониите што презимиле исто така имаат корист од пролетно кратење. Во април се отстрануваат издолжените и слаби делови, а растението може да се скрати и до една третина. По тоа, брзо се обновува и добива погуст и покомпактен раст.
Добро реагираат и украсните видови жалфија и мачкина трева. Со отстранување на старите и исушени делови се поттикнува раст на нови, свежи изданоци што ќе процветаат уште кон крајот на пролетта. Редовното кратење во текот на сезоната кај овие растенија може да донесе и второ цветање.
Април, значи, не е само месец за нов почеток во градината, туку и време кога со неколку внимателни потези може да се обезбеди многу побујна и поубава сезона.
